Gaur egungo mundua interpretatzeko gakoak diren gai eta eztabaidetarako tresnak eskaini nahian jaio zen Iparrorratza bilduma eta abertzaletasuna, neoliberalismoa, elikadura, hezkuntza, feminismoa, sozioekologia eta geopolitika izan dira orain arte jorratutako gaiak.

Hamargarren liburuxkara iritsi da Iparrorratza bilduma, Iratzar fundazioak eta Txalaparta argitaletxeak elkarlanean duela bost urte abiatutakoa. Gaur egungo munduaz hausnartu eta eztabaidatzeko asmoz, hainbat gairi buruzko liburuak eman ditu orain arte lankidetza horrek, eta berriak ere etorriko dira.

Gaur egungo mundua interpretatzeko tresnak eskaini nahian jaio zen Iparrorratza bilduma, Txalaparta eta Iratzarren lankidetzari esker, 2020ko irailean. Orduan iragarri bezala, liburuxka arinen bitartez ideien lehian eragitea zen asmoa, egungo errealitatea kokatu, interpretatu eta hura eraldatzeko tresnak zein eztabaidak mahai gaineratuz. 

Iratzar fundazioaren egitekoen artean, memoria eta kontakizuna, ideien lehia, trebakuntza eta ahalduntze politikoa daude, eta Iparrorratza liburu bilduma bide horretan bete-betean eragiteko beste tresna bat da. Hain zuzen, Iparrorratza izena jarri diogu gaur egungo mundua interpretatu eta berau eraldatzeko emantzipaziorako gakoak eta eztabaidak mahaigaineratzeko asmoa duen heinean.

Ahalduntzeko tresna izan nahi dute liburuxka hauek, eta emantzipazio proiektu politikoei ekarpena egingo diote: lehenik, gaien gaurkotze eta hausnarketen bidez; bigarrenik, talde eta komunitatearekin eztabaidatzerakoan; eta, azkenik, idazleak berak egingo duen sorkuntza-sintesi eta idazketa prozesuaren bidez.

Orain, ia bost urte pasa direnean, hamargarren alera iritsi da bilduma, Naia Torrealdai Mandalunizen Amaieratik hasi. Euskal feminismoa, aldaketarako paradigma izeneko lanarekin.  Liburuan, azken urteetan mugimendu feministetan eta feminismoen izenean gertatu diren banaketa, eztabaida eta zatiketen erroetara jo du autoreak, beti ere Euskal Herriko begiradatik, eta tokiko praktiketan oinarrituta.

Hamargarrena, beraz, kalean da dagoeneko, eta  iritsiko dira berriak ere, orain arte abertzaletasunaz, neoliberalismoaz, elikaduraz, hezkuntzaz, feminismoaz, sozioekologiaz edota geopolitaz hausnartu bezala, egungo mundua ardazten duten bestelako errealitateez ere hausnartzen segitzeko.