Dagoeneko izen ematea zabalik UEUk eta Iratzar Fundazioak elkarlanean antolatu dugun tailerrean parte hartzeko: «Euskal Herri maitea, afektuak eta euskal askapen desira gaur egun». Ekainaren 27an, asteartea, [09:45etik 17:30ak arte] eta 28an, asteazkena, [10:00etatik 13:00ak arte] Iruñeako Katakrak gunean egingo dugu ariketa kolektibo hau.

Zerk pizten ditu gure desirak? Nola eraikitzen eta kutsatzen dira desirak gaur egun? Zein da nazioa, kultura, hizkuntza edo egitasmo politikoenganako atxikimenduaren dinamika? Paradigma berriak agertu dira azken hamarkadetan motibazio kolektiboen azterketan eta formulazioetan, feminismotik, besteak beste. Horrek emozioen eta arrazoiaren dikotomia kolokan jarri du.

Tailerraren helburua izango da gaur egun desirari, afektugintzari eta atxikimenduari buruz dauden zenbait teoria eta hausnarketa geureganatzea. Horretarako, gogoeta horiek Euskal Herriko egungo egoerara ekarri nahi ditugu, praktikatik hemen eta orain egiten ari diren hausnarketak ere ezagutzeko. Elkarrekin pentsa dezagun, gonbidatuko ditugun irakasle edo parte hartzaileez gain, bertaratuko garen guztion iritziak eta ekarpenak trukatzeko aukera ere eskainiko dugu.

Tailerrean, beste lagun batzuen artean, honako hauek hartuko dute parte: Alba Garmendia, Edu Apodaka eta Mikel Urdangarin, Lur Albizu Etxetxipia eta Eraitz Saez de Egilaz Ramos, Estitxu Garai, Ainhoa Olaso eta Ane Elordi.

Dagoeneko matrikula zabalik dago www.ueu.eus helbidean.

EGITARAUA:

2023-06-27 [asteartea]

9:45 - 10:00 Harrera eta dokumentazioa banatzea.

10:00 - 10:30 Ongietorria eta jardunaldiaren aurkezpena.

• Aitor Bengoetxea Alkorta, UEUko zuzendaria.
• Iratzar Fundazioa.

10:30 - 13:00 Pote filosofikoak. Desirari buruzko 10 tesiak.

• Alba Garmendia Castaños (Filosofian doktorea. UPV/EHU)
• Edu Apodaka Ostaikoetxea (Filosofian lizentziatua eta Soziologian doktorea. UPV/EHU)
• Mikel Urdangarin Irastorza (Filosofian graduatua. Doktoregaia. Joxe Azurmendi Katedrako bekaduna. UPV/EHU. Ernaiko kide ohia.)

Metodologia: hirukoteak tesiak aurkeztuko dituzte eta taldetan lan egiten hasiko gara. Gutxika, desirari buruzko marko teorikoan sartuko gara.

13:00 - 15:30 Bazkalordua.

15:30 - 17:30 Gureak ere badira. Desira, Boterea, Epika.

• Lur Albizu Etxetxipia (Euskal Ikasketetan graduatua. Irakaskuntzako masterra eta Subiranotasuna Europako Herrietan masterra. Ernaiko kide ohia eta Sortuko kidea gaur egun.)
• Eraitz Saez de Egilaz Ramos (Zuzenbidean graduatua. Abokatutzako masterra eta Subiranotasuna Europako Herrietan masterra. Ernaiko kide ohia eta EH Bilduko legebiltzarkidea gaur egun.)

Metodologia: Argitaratu berri duten liburutik tiraka, desira, boterea eta epika berriak osatzeko tesi proposamenak aurkeztu, eta guztion artean eztabaidatzeko metodologiak proposatuko ditugu.

2023-06-28 [asteazkena]

10:00 - 11:30 Mahai ingurua: Kultura eta herrigintza, desiraren, afektuen eta atxikimenduen ikuspuntutik.

• Estitxu Garai Artetxe (Publizitate eta Harreman Publikoetan lizentziatua eta Gizarte Komunikazioan masterra. Publizitatean doktorea, UPV/EHU)
• Ainhoa Olaso Sopelana (Ikus-entzunezko Komunikazioan graduatua. Gidoigintzan aritua eta aditua. Orain Bilgune Feministan)
• Ane Elordi Alburquerque (Kazetaritzan lizentziatua. Korrikaren arduraduna)
• Leire Vargas Nieto (Idazlea eta bertsolaria)

Metodologia: Musikatik, ikus-entzunezkoetatik eta herrigintzatik zein kulturgintzatik dauden eskaintza kultural ezberdinetatik datozen pertsonak jarriko ditu solasean Estitxu Garaik.

11:30 - 12:00 Atsedenaldia.

12:00 - 13:00 Tailerraren sintesia eta ondorioak ateratzeko ariketa kolektiboa.